Roz 15 baar same sawaal, Maa ko bhoolne ki bimari! Koi ilaaj ya trick batao?

Maa ka aaj phir wahi sawaal. "Beta, aaj kya din hai?" maine kaha "Monday hai Maa." 2 minute baad phir "Beta, aaj kya din hai?" maine fir se jawab diya. Aise chalta raha poora din. Ek baar to mujhe laga main pagal ho jaaunga. Uske baad woh puchti hain "Mere papa kahan hain?" (woh 20 saal pehle guzar chuke hain). Main batata hoon "Maa, papa nahi hain." Woh ro deti hain. Phir 5 minute baad wahi sawaal.

Doctor ne Galantamine diya hai, lekin koi fark nahi pad raha. Kya koi aur dawai hai jo is repetitive questioning ko kam kar sakti hai? Ya koi technique hai? Main roz 10-15 baar wahi jawab dekar thak gaya hoon. Kabhi kabhi main jhooth bol deta hoon ki "papa ghar pe hain" toh woh shaant ho jaati hain, lekin mujhe bura lagta hai.

Aur family support zero hai. Mere bhai ka kehna hai "Maa ko aise hi rehne de, kya karega." Lekin woh ghar pe nahi rehte, woh nahi dekhte ki Maa kitna pareshan karti hain raat ko bhi. Koi aapna batao, yeh sab kaise handle karte ho? Thoda guidance do bhai log.