PCOS aur weight gain ka mamla! 6 mahine ki shaadi, saas ka sawaal - vitamins ya koi bimari? Kya karun?

Mujhe samajh nahi aa raha kya karun yaar. Shadi ko 6 mahine hue hain aur pehle se hi periods ka issue tha, ab weight bhi bohot badh gaya hai. Pehle 55 kg thi, ab 68 ho gayi hoon. Mummy ji (saas) roz kuch na kuch kehti hain ki "beta tumhe kuch khaana toh nahi lagta par weight kaise badh raha hai?" Jaise main kuch chhupa rahi hoon.

Aaj subah unhone dekha ki main PCOS ki dawai le rahi hoon toh puch liya - "yeh kya hai? Koi bimari toh nahi?" Main ne jhooth bol diya ki vitamins hain. Pata nahi kya sochengi agar sach pata chal gaya.

Shaadi ke baad se ghar ka kaam bhi hai, thakawat bhi hai, aur kuch khane ka mann nahi karta phir bhi weight badh raha hai. Koi batao, PCOS mein weight loss kaise karein? Koi ghar ka nuskha ho toh batao. Doctor ne bas exercise aur diet bola hai par kuch kaam nahi kar raha. Bahut tension ho rahi hai. 😢