**Lupus ka fatigue khatam nahi hota? Log mujhe aalsi samajhte hain, kya karun?**

Aaj subah uthi toh butterfly rash zyada badh gaya tha. Pata nahi kyun, shayad kal raat zyada thak gayi thi. Mera beta bolta hai, "Mumma, aapko to kuch hota bhi nahi, bas aalsi ho gayi ho." Uske school ke PTM mein gaya nahi ja paayi. Principal ne bola, "Mrs. Nair, aapki involvement nahi hai." Aur main sochti hoon, kaise samjhaoon ki mere andar ek war chal raha hai, har roz.

Hydroxychloroquine le rahi hoon, par fatigue khatam hi nahi hoti. Kuch din pehle doctor ne Vitamin D aur iron ki bhi injection di. Thoda better feel hota hai, par logon ko dikhta nahi. Mere pati ke relatives aate hain toh kehte hain, "Itni jaldi kya thak jaati ho?" Jaise main mazaa lene ke liye bed par padi hoon.

Koi batao, aap log kaise handle karte ho jab log aapki bimari ko seriously nahi lete? Aur ye fatigue kabhi kam hoti hai ya bas adjust karna seekhna padta hai?