Asthma hai toh kya? Log kya kahenge? 10 saal ka beta bhi sharma raha hai!

Yaar, aaj subah office ke liye nikla toh hawa phir se zahar jaisi thi. Andar se saans ghutne lagi, wohi tightness shuru ho gayi. Pata hai mujhe ki inhaler nikalna chahiye, lekin metro station pe bheed dekh ke sochta hoon ki log kya sochenge. Phir ek do minute rukta hoon, lekin aaj toh halat itni kharab ki bag se nikal ke use karna pada. Ek uncle ne dekha toh seedha pooch liya, "beta kya bimari hai?" Thoda awkward laga, lekin maine seedha kaha ki asthma hai. Woh uncle toh theek the, bas bol diye "haan haan, pollution ne sabko beemar kar diya" aur chale gaye.

Lekin main sochta hoon ki kuch log aise hote hain jo ghoor ghoor ke dekhte hain, jaise hum kuch galat kar rahe hain. Mera beta bhi ab mujhe bolta hai ki "papa, ghar pe rakho inhaler, baahar mat laao." Uski umar hai 10 saal, usko bhi yeh sharm aati hai. Main roz morning walk pe bhi jaata hoon, lekin ab darr lagta hai ki kahi attack na aa jaye aur log dekhne lag jayen.

Aap logon ko bhi aisa lagta hai? Ya ab aadat ho gayi hai ki koi kuch bhi soche, hume apni health important hai? Koi tip ho toh batao, specially jab bachche bhi aisa feel karein.