5 saal transplant ke baad bhi har test mein darr lagta hai, koi aur hai yahan?

Mujhe aaj kal bahut soch aati hai. 5 saal ho gaye transplant ko, par ab bhi woh waiting period ka darr khatam nahi hua. Main toh sochti thi ki transplant ke baad sab theek ho jayega, par rejection ka dar toh har test ke saath aata hai.

Mere bhai ka kidney match hua tha, woh bhi 3 saal wait karna pada. Tab ja ke mila. Par ab bhi har 3 mahine blood test aur biopsy hote hain. Kal hi creatinine thoda upar tha, doctor ne tacrolimus dose badhaya. Bahut ghabrahat ho rahi hai.

Family support toh hai, lekin mummy roz kehti hain "beta tension mat le", par unko bhi pata nahi kya chal raha hai mere dimaag mein. Office mein bhi colleagues puchte hain "sab theek hai na?", toh main just smile kar deti hoon.

Mera sawaal yeh hai: Kya koi aur bhi yahan hai jiska transplant hua ho aur rejection ka dar har test ke saath aata ho? Kaise handle karte ho aap log? Kya koi remedy ya routine follow karte ho jo thoda calm rakh sake?