5 saal pehle kidney transplant, ab baby plan karna safe hai? Mera experience aur sawaal!

Yaar, main bahut confused hoon. Kidney transplant hua tha mera 5 saal pehle, alhamdulillah abhi tak sab theek chal raha hai. Par ab meri umar 34 hai, main aur mere husband ek baby plan kar rahe hain. Lekin mujhe dar lagta hai – rejection ka darr, immunosuppressants ka effect, aur doctor ne bhi kuch clear nahi bataya.

Kuch hafte pehle maine apne nephrologist se baat ki, unhone kaha ki pregnancy possible hai but high-risk category mein aata hai. Unhone creatinine aur BP stable rakhne ko kaha, aur immunosuppressant doses adjust karne padenge. Lekin main sochti hoon – kya main risk le sakti hoon? Kya mera body itna strong hai? Ghar mein bhi pressure hai, sasur ji kehte hain "ab toh natural ho jaana chahiye", lekin mujhe lagta hai woh samajh nahi paate ki transplant ke baad sab kuch normal nahi hota.

Mera ek specific sawaal hai: kisi ko bhi transplant ke baad pregnancy hui hai? Kya immunosuppressants (main tacrolimus le rahi hoon) baby ko affect karte hain? Aur kya ek healthy kidney transplant ke 5 saal baad bhi pregnancy safe hai? Please apne experiences share karo, main bahut confuse aur anxious hoon. 🙏