4 saal ka beta ab tak nahi bol raha, autism indication hai, PECS therapy chal rahi hai - kya kabhi baat karega? Family support nahi, please help!

Mera beta 4 saal ka ho gaya hai aur abhi tak proper words nahi bolta. Kuch sounds nikalta hai, "mama" "papa" bhi clear nahi hai. Speech therapist ne autism spectrum ka indication diya hai. Pichle mahine ek naya therapist start kiya hai joh PECS cards use kar raha hai - woh pictures dikhate hain aur beta unhe point karta hai kuch maangne ke liye. Thoda improvement hai par baat nahi ho rahi.

Ghar mein sab kehte hain "ladke late bolte hain, tension mat lo." Meri saas toh bolti hain ki "tum hi doctor ke chakkar mein ghum rahi ho." Unhe samajh nahi aata ki jab mera beta 2 saal ka tha tab bhi kuch nahi bolta tha. Ab toh school bhi nahi ja pa raha kyuki woh dusre bachchon ke saath interact nahi kar paata.

Mujhe dar lagta hai - kya woh kabhi baat karega? Kya yeh therapy kaam karegi? Koi aur hai jiska bacha 4 saal mein bhi speech delay tha aur phir improve hua? Kya karna chahiye jab family support nahi mil raha? Thoda guidance chahiye.