3 mahine liquid diet pe, kya koi aur bhi hai is phase mein?

Doston, aaj kuch din pehle hi mera checkup hua. Doctor ne kaha abhi bhi liquid diet pe rehna padega. 3-4 mahine ho gaye bas smoothie, daal ka paani, soup, kuch bhi solid nahi. Mera operation hua tha jaw mein, gutkha khane ki wajah se. Ab bolta hoon toh awaaz clear nahi aati, par kya karein, jo hua so hua.

Family mein sab pareshan hain. Meri biwi roz alag alag juice banati hai, par mann karta hai ek roti kha loon, ek aloo ka paratha. Lekin doctor ne mana kiya hai, infection ka dar hai. Bada ajeeb lagta hai, sab log kha rahe hain aur main dekh raha hoon. Kabhi kabhi gussa bhi aata hai apne aap par ki kyun khaya woh gutkha. Bacche bhi puchte hain, "Papa aap kyun nahi kha sakte?" Unhe kya samjhaun.

Mera sawaal yeh hai ki kya koi aur bhi is phase se guzra hai? Liquid diet se aap kaise cope karte the? Aur kya koi tips hain ki mann kaise lagaen? Bahut mushkil ho raha hai doston. Aapka experience share karo, please.